Neskak kirolari

Lehen, bazirudien kirola praktikatzea bakarrik mutilen kontua zela, baina azken urteotan gero eta neska gehiago animatu dira kirola praktikatzera. Egun, ia kirol guztietan, bai bakarkako kiroletan, bai taldeka jolasten diren kiroletan, neskak aurki ditzakegu. Baina oraindik ere kirolean aritzen diren neskak mutilak baino askoz gutxiago dira. Neska gehienak txikitatik hasten dira kirolen bat egiten, baina helduagoak direnean, utzi egiten diote kirola egiteari. Izan ere, arlo gehienetan ez dirudi neskak kirolari profesional izan daitezkeenik, edo behintzat, mutilek baino askoz zailagoa daukate.

Azken aldian, urrats asko eman du gizarteak nesken eta mutilen arteko berdintasuna lortzearren. Hala ere, arlo guztietan ez da berdintasun osoa lortu. Arlo horietako bat kirola da, hain zuzen ere. Oraindik, topiko asko daude kirolaren gainean. Jendeak uste du kirol batzuk ez direla aproposak neskentzat, edo mutilentzako eta neskentzako kirolak daudela eta bereiztu egin behar direla. Gainera, nesken kirolak arrakasta gutxi izaten du jendearen artean, eta oso jende gutxi joaten da nesken partidak ikustera.

Aurrekoa kontuan hartuta, ez da harritzekoa neskek azkenean kirola uzteko erabakia hartzea. Alde batetik, gogoa galtzen dutelako, eta bestetik, nesken kirolak ez omen duelako saltzen ezta negozio aukerarik sortzen ere komunikabideetan. Horregatik, neska kirolari profesionalek, mutilekin alderatuta, oso gutxi kobratzen dute, nahiz eta oso onak izan.

Bizi garen gizartean nesken eta mutilen arteko berdintasun osoa lortu nahi badugu eta bizitzako arlo guztietan diskriminazioa alde batera utzi nahi badugu, oso garrantzitsua da kirolean ere berdintasun hori lortzea. Horretarako, oraindik oso barneratuta daukagun hainbat topiko baztertu behar dugu. Hau da, onartu behar dugu ez daudela ez nesken eta ez mutilen kirolak eta bakoitzak praktika dezakeela gogoko duena. Beste alde batetik, mutil kirolarien ahalegina saritzen den modu berean saritu beharko litzateke neskena, horrela neskak motibatuta jarraitzeko aukerak handituko baitzirateke. Eta azkenik, telebistaren bidez eta beste komunikabideen bidez, publizitate gehiago eman beharko liekete nesken partidei, jendea ikustera anima dadin